Poslovne vesti - Makedonija

Македонија успешно се справи со економската криза

Извршната директорка на Меѓународниот монетарен фонд (ММФ), Кристин Лагард, на почетокот на пролетното заседание на Фондот и Светска банка во Вашингтон апелира до развиените земји во светот да го поттикнат економскиот раст и да применат одлучни мерки за надминување на глобалната економска криза, која трае веќе пет години.

Лагард истакнала дека Европа, Јапонија и САД заостануваат во примената на неопходните мерки за повторно воспоставување на цврсто и одржливо темпо на глобалниот економски раст.

- Светската економија и понатаму се соочува со значајни проблеми, со ризик од продолжениот период на слаб раст - наведе Лагард.

На пролетното заседание во Вашингтон се и вицепремиерот министер за економија, Зоран Ставрески и гувернерот на Народната банка на Македонија, Димитар Богов кои изјавија дека овие институции ги повторуваат позитивните оценки за состојбата н македонската економија во однос на остатокот од Европа.

- Македонија е оценета како една од поуспешните земји според начинот на кој што се справивме со економската криза. Евидентно е дека во проценките на ММФ и СБ светската криза е се уште присутна, има ризици за сите економии вклучително и за нашата, но овие институции оценуваат дека земјава има добар потенцијал за остварување на економскиот раст за оваа година, но и во идните неколку години кога ќе се создадат подобри услови во европската економија. Нивото на државниот долг на Македонија е оценето како умерено и е едно од најниските во Европа, што секако е охрабрувачки знак - изјави Ставрески, потенцирајќи дека овој показател е еден од најголемите проблеми за многу европски држави....

Гувернерот Богов ги информирал претставниците на ММФ за стабилноста на банкарскиот систем во ситуација на сите нестабилности кои владеат во евро-зоната и во банките во неа.

- Македонскиот банкарски систем нема да биде загрозен, има потенцијал, отпорен е и според сите наши анализи и стимулации, тој ќе ги издржи сите удари без поголем проблем - изјави Богов.